Пенсия турында

Пенсия турында

“2015 елның 2 июлендә III төркем инвалидлык турында танытма бирделәр. 2016 елның 1 июлендә тагын килерсең дип әйттеләр. Кызганычка каршы, мин вакытында бара алмадым. Шулай да 1 августтан тукталырга тиеш пенсияне мин тагын 4 ай буена алдым. Беркөнне пенсия фондына чакырып, сезгә ялгыш түләгәнбез дип әйттеләр. Гариза яздырдылар, бурычыгызны түләгез дип әйттеләр. Хәзер ай саен пенсиядән тотып алып калалар. Алар минем пенсияне алып калырга хокуклымы?”

 

 Э. Фәйзуллина .Чишмә авылы.

 

Әлеге проблема буенча без РФ Пенсия фондының БР буенча бүлекчәсенә мөрәҗәгать иттек. Әлбәттә, тиеш булмаган очракта  сезгә пенсия түләнеп бару – ул, иң беренче чиратта пенсия фондының хатасы. Сез ул акчаларны кире кайтармаска да мөмкин идегез, тик сез гариза язып, аларны кайтарырга ризалашкансыз. Бу очракта алар шул гаризага таянып, пенсиягездән ай саен акча тотып кала алалар. 

 

Янә ОДН турында

Янә ОДН турында

“Безне борчыган нәрсә ОДН дип атала, электр өчен түләүгә кагыла. Бу хәл 2014 елның октябрь аенда башланды. Безнең йорт 3 катлы, 3 подъездлы. Октябрь аенда подъездда урнашкан счетчикларны тикшереп йөрүче контролерны кыскарттылар да, 24 квт. сәг. ОДН өстәп китерделәр. “Подъездда янган лампочкалар өчен” дип без аны түләдек. Ә ноябрь аена 156 квт. сәгать ОДН өстәп китерделәр. Шулай итеп түләмәгәннәр өчен без үзебезнең кесәдән түләргә тиешбез. Алар бит безнең балигь булмаган балаларыбыз түгел ОДН дигән нәрсәне Сантыйлар илендәге могҗизалар кыры белән чагыштырасы килә. Чөнки ул Базилио песи һәм Алиса төлке кебек аферистларга алтын тәңкәләр үстерү өчен бик яхшы ысул бугай”. 

Фларит НӘсибуллин .

Чакмагыш авылы. 

 

ОДН турында күп сөйләдек, күп яздык. Шулай да әлеге темага тагын бер тапкыр тукталып китәбез. 2017 елның 1 гыйнварыннан Торак кодексына яңа үзгәрешләр кертелде. Аларга ярашлы, ОДН хәзер норматив буенча исәпләнәчәк, аны төбәкнең Тарифлар буенча дәүләт комитеты билгеләргә тиеш. Икенче төрле әйткәндә, идарә итүче оешмалар ОДН өчен исәпне куелган тарифтан артыграк исәпләсәләр, бу инде законны бозуга керә. 

Шулай ук фатир хуҗалары гомум җыелыш җыеп, Торак надзоры буенча комитетка мөрәҗәгать итеп ОДНның суммасын үзгәртергә хокуклылар. Яңа закон алдакчы оешмаларга ОДН графасына өстәп акча язуларга юлны кыскартачак дип күзаллана. 

 

Субсидияне ничек алырга?

Субсидияне ничек алырга?

Мин ике бала әнисе, әлеге вакытта декрет ялындамын. Гаиләдә бары тик тормыш иптәшем генә эшли. Безнең гаилә торак коммуналь хезмәтләр өчен субсидия алырга хокуклымы? 

 

Сания ТӨхвӘтуллина . 

Уфа шәһәре. 

 

Әйткәндәй, безнең редакциягә мондый сораулар еш килә. Сезгә җавап итеп шуны әйтәбез, дәүләттән матди ярдәмне барлык гражданнар да ала ала. Әгәр дә квартплата өчен түләүләр сезнең гаилә бюджетының 22 процентыннан арта икән, социаль хезмәткә яисә МФЦга мөрәҗәгать итә аласыз. Аннан соң инде коммуналь уңайлыклар өчен ай саен түләп барасыз һәм  соңыннан сезнең банк исәбенә компенсацияне кайтарачаклар. Бер генә шарт бар: сезнең квартплата буенча бурычларыгыз булмаска тиеш. 

Пособиеләр күләме

Пособиеләр күләме

 

2017 елның 1 февраленнән балалар пособиеләренең күләме артты дип ишеткән идек. Күпмегә артты икән алар? 

 

Самира Әхмәтвәлиева. Әлшәй районы. 

 

Чынлап та, 2017 елның 1 февраленнән башлап халык телендә “декретный” һәм “балалар” пособиесе дип йөртелгән түләүләрнең күләмнәре артты. 

1.Йөклелекнең 12 атнасына  кадәр медицина учреждениеләрендә исәпкә баскач ала торган пособиенең күләме 613,14 сум тәшкил итә. 

2. Бала туганнан соң бер тапкыр ала торган пособие күләме 16 350, 33 сумга җитте. 

Балага 1,5 яшь тулганга кадәр ай саен бирелә торган пособиенең минималь күләме беренче бала өчен 3065,69 сум тәшкил итә, икенче һәм аннан соң туган балалар өчен 6131,37 сум. Ә инде эшләгән аналарга әлеге пособие уртача эш хакының 40% күләмендә түләнә. Шулай да аның максималь суммасы 23 120, 66 сумнан артып китмәскә тиеш 

3.Йөклелек һәм бала табу буенча пособиенең (декрет акчалары, бала тапканга кадәр 70 көн һәм бала тугач 70 көн) бер ай өчен максималь суммасы 57, 833,33 сум тәшкил итәчәк. 

4.Чакырылыш буенча хәрби хезмәт үткән хәрбинең авырлы тормыш иптәшенә бер тапкыр бирелә торган пособие күләме 25,892,45 сум тәшкил итә,  ай саен баласына бирелә торган пособие күләме– 11 096,76 сум. 

Җирләү өчен дигән пособиене ник түләмәделәр?

Исәнмесез! “Өмет”кә соравым бар  иде. Минем тормыш иптәшем быел май  урталарында кинәт кенә үлеп китте. Авыл халкыннан сөт җыя иде. Аны җирләүгә дигән пособиене никтер түләмәделәр. Ирем 1949 елгы иде. Шул пособиене юллап алып буламы? Икенче соравым да бар: без ирем белән, кызыбызга ярдәм итик дип, банктан ссуда алып биргән идек. Хәзер ирем мәрхүм булгач, берүземә түләве авыр. Ирем поручитель булды. Беләсе иде, аның мәрхүм булуын исәпкә алып, банк ссуданың күләмен киметә алмыймы икән?

Рәзидә Хәбибуллина.

 

 

Җирләү өчен (ул “погребальное пособие” дип атала) социаль пособие дәүләт казна учреждениесе –  Республиканың халыкка социаль ярдәм күрсәтү үзәге филиаллары  – тарафыннан түләнә. Җирләү буенча пособие түбәндәге очракларда түләнә:

– мәрхүм булган кеше вакытлыча эшкә сәләтсез калу очрагы буенча мәҗбүри социаль страховкаланмаган булса, пенсионер булмаса;

– йөклелекнең 196 көне үткәннән соң сабый үле туса.

Бу социаль пособие кеше үлгән көннән алып мөрәҗәгать иткәннән соң алты ай эчендә түләнә.

Җирләү буенча пособие күләме 2015 елның 1 гыйнварына –  6 068,87 сум.

Рәзидә Хәбибуллина аңлатуынча, аның тормыш иптәшенә 67 яшь, димәк, ул хаклы ялда булган.

Рәзидә апаның икенче соравы буенча Россельхозбанк  директоры урынбасары Роберт Биктимиров җавап бирде:

–  Сүз, мөгаен, кредит турында барадыр, – диде ул. –  Поручитель булган кеше мәрхүм булса да,  кредитны түләргә туры киләчәк. Ләкин бу очракта пролангация – аны икенче төрле реструктуризация дип тә атыйлар – үткәрүне сорап банкка мөрәҗәгать итәргә кирәк. Нәтиҗәдә, кешегә түләргә җиңелрәк булсын өчен айлык түләүләрне киметәләр, ә түләү срогы озаграк була. Пособиене юллау мәсьәләсе белән халыкны социаль яклау идарәсенә мөрәҗәгать итәргә кирәк.

 

Государственное унитарное предприятие Республики Башкортостан Издательский дом «Республика Башкортостан»
Филиал: Редакция газеты «Омет»- филиал государственного унитарного предприятия Республики Башкортостан Издательский дом «Республика Башкортостан»
450079, г. Уфа, ул. 50-летия Октября, дом 13, 9 этаж, тел. 273-94-38, 273-64-81, e-mail: omet-ufa@mail.ru
Вся информация и материалы, размещенные на сайте редакции газеты «Омет» защищены международным и российским законодательством
об авторском праве. Все сообщения газеты «Омет» предназначены для пользователей старше 12 лет.
При перепечатке или цитировании ссылка на газету «Омет» обязательна.
Дизайн сайта- Абдуллин Фаниль
>